БИШКЕК, 30-ноя. — Sputnik. Участкалык милиционер өлтүрүлгөн аймактан табылган велосипеддердин ээсин изделип жатканын ИИМ билдирди.
Маалыматка ылайык, үстүбүздөгү жылдын 19-ноябрда Бишкектин 8-кичи районунда эки белгисиз адам участкалык милиционер Актилек Абдувалиевди атып кетишкен. Иш ИИМ жетекчиси Мелис Турганбаевдин жеке көзөмөлүнө алынган. Кылмышка шектүү жарандар тууралуу так маалымат бергендерге ИИМ 1 миллион сом өлчөмүндө сый акы жарыялаган.
Милиция объективдүүлүк жана тергөөнүн толук болушу үчүн учурда аталган велосипеддердин ээсин издеп, көргөн-билгендер болсо, 66-06-83, 26-62-61, 0554 102-328 жана 0554 102-327 телефондору аркылуу байланышууну суранып жатат.
Актилек Абдувалиев Жалал-Абад облусунун Кашка-Суу айылында 1989-жылы төрөлгөн. Кыргыз мамлекеттик юридикалык академиясын аяктап, 2012-жылдан тарта ички иштер органдарында эмгектенип келген.
