БИШКЕК, 20-ноя. — Sputnik. Милиция 8-кичи райондо милиция кызматкерин өлтүрдү деп шектелген жарандардын болжолдуу фотороботун түздү.
Учурда ал укук коргоо кызматкерлерине берилди. ИИМдин маалыматы боюнча алардын биринчиси арык чырай келген 25-30 жаштардагы азиат, бою болжол менен 175-180 сантиметр. Экинчиси толмочунан келген 20-25 жаш курактагы азиат улутундагы жаран болгон. Тергөөчүлөр фотороботту күбөлөрдүн сөзүнүн негизинде түзүшкөн.
Милиция фотороботтордун окшоштугу 70 пайызды түзөрүн белгиледи.
Буга чейин ИИМ кылмышкерлери тууралуу туура, так маалымат үчүн бир миллион сом өлчөмүндө сый акы жарыялаган.
Мындан тышкары, бейшемби түнү 7-кичи районунда кылмышкерлер из жашырып кетиши мүмкүн деп болжолдонгон велосипед табылганы айтылууда.
Башкармалыктагы өздүк булактын айтымында, милиционер эки үй уурусун кармоо учурунда өлтүрүлгөн. Абдувалиевге үч ирет ок атылган. Алдын ала маалымат боюнча аны так маңдайынан туруп Макаров пистолети менен атып кетишкен.
Учурда милиционерди өлтүргөн кылмышкерлерди тактоо жана аларды кармоо боюнча ыкчам-иликтөө иштери жүрүп жатат. Факт боюнча кылмыш иши козголду. Тергөө иштерине ИИМ жетекчиси Мелис Турганбаев өзү көзөмөл жүргүзөт.
Актилек Абдувалиев Жалал-Абад облусунун Кашка-Суу айылында 1989-жылы төрөлгөн. Кыргыз мамлекеттик юридикалык академиясын аяктап, 2012-жылдан тарта ички иштер органдарында эмгектенип келген.
