БИШКЕК, 20-ноя. — Sputnik. Кыргызстандыктардын болгону 19 пайызы финансы боюнча сабаттуу экенин Standard &Poor’s агенттигинин глобалдуу рейтингинде аныкталган. Ушундай эле көрсөткүчкө Бангладештин эли да жетишкен.
Борбор Азия өлкөлөрүнүн ичинен Кыргызстан элинин 17 пайызы финансылык сабаттуу деп эсептелген Тажикстанды гана артка калтыра алды. Ал эми изилдөө боюнча сабаты жоюлган түркмөндөр 41 пайызга ээ болсо, андан кийинки орунда 40 пайыз менен Казакстан, 21 пайыз менен Өзбекстан жайгашкан.
Рейтингдин алдыңкы сабын Дания, Норвегия жана Швеция өлкөлөрү ээлеген. Мында финансылык жактан өтө сабаттуу адамдардын саны 71 пайызды түзгөн. Standard &Poor агенттигинин иликтөөсүнө ылайык, дүйнөдөгү чоң кишилердин үчтөн бири гана финансылык жактан сабаттуу экени аныкталган.
Изилдөө 140 мамлекеттеги улуу муун арасындагы 150 миң кишини сурамжылоонун негизинде түзүлгөн. Бир жыл бою жүргүзүлгөн иш-чарада адамдардын пайыздык чен, инфляция тууралуу билими текшерилген.
