БИШКЕК, 13-окт. — Sputnik. Бишкекте белгилүү композитор, Кыргыз ССРинин эл артисти, Токтогул сыйлыгынын лауреаты Жамумүдүн Шералиевдин 100 жылдыгына карата айкели орнотула турганын Маданият, маалымат жана туризм министрлиги билдирди.
Маалыматка ылайык, бюст №6 музыкалык мектептин окуу корпусунун алдында коюлат. Анын салтанаттуу ачылышы 14-октябрда саат 9.00гө белгиленген.
Бул күнү улуу композитордун мааракесине карата бир катар иш-чаралар өтүп, кечки саат 18.00дө Токтогул Сатылганов атындагы улуттук филармонияда ири программадагы концерт өтөт.
Композитор, акын, обончу Жумамдүн Шералиев 1915-жылы 3-сентябрда Ат-Башы районунда туулган. 700гө чукул ырга обон жараткан чыгаан инсан ооруну айынан 1994-жылы 15-мартта 79 жашында дүйнөдөн кайткан.
