БИШКЕК, 7-окт. — Sputnik. Бүгүн Россиянын башчысы Владимир Путин 63кө чыгып жатат жана ал өз туулган күнүндө белгилүү хоккейчилер жана Түнкү хоккей лигасынын катышуучулары менен муз майдаңына чыгат.
"Путин хоккей ойнойт. Ал, салтка айлангандай, өзүнүн эски тааныштары, атактуу ардагер хоккейчилер жана эртең сезонун баштаганы жаткан Түнкү хоккей лигасынын катышуучулары менен чыгат", — деди журналисттерге мамлекет башчысынын маалымат катчысы Дмитрий Песков.
Президент азыр иш сапары менен Сочиде жүрөт.
2013-жылы болсо ал туулган күнүн курортто, бирок жумуш үстүндө – Индонезиянын Бали аралына АТЭСтин саммитине катышып жүрүп өткөргөн. Жумуштун көптүгүнө карабай, президент белексиз калган эмес. Тартуулардын арасында күтүлбөгөн белектер да болгон. Мисалы, ал күнү эртең менен Путинди саммиттин отуруму өтүп жаткан залда Индонезиянын лидери Сусило Бамбанг Юдойоно Happy Birthday to You ("Туулган күнүң менен") аттуу ыр менен тосуп алган. Баса, аны Юдойоно өзү гитара чертип ырдап, ал эми жолугушуунун башка катышуучулары аны коштоп турган. Кечирээк Япониянын премьери Синдзо Абэ Путинге өз өлкөсүнүн салттуу ичимдиги сакэ тартуулап, ал эми КЭРдин төрагасы Си Цзиньпинден Россиянын мамлекет башчысы торт алган.
Хоккей…
Путин хоккей ойной баштаганына аз эле болсо да, жолдоштук беттешүүлөрдө бир нече жолу муз майданына чыккан. 1-сентябрда ал Сочиде "Сириус" билим берүү борборунун окуучулары менен ойногон. Мамлекет башчысы салт боюнча 11-номер менен чыгып, ага Вячеслав Фетисов, Павел Буре, Валерий Каменский, Александр Овечкин жана Евгений Малкин сыяктуу атактуу хокейчилер шериктештик кылган.
Россиянын президенти 2012-жылы өз инаугурациюсынан бир нече гана саат өткөндөн кийин ушул эле Түнкү хоккей лигасы менен музга чыккан. Бул Путиндин алгачкы оюндарынын бири болчу.
Спортсмендер менен турнирлерге катышуудан тышкары, Путин өзүнүн саясаттагы кесиптештерин, мисалы, Финляндия менен Белоруссиянын президенттерин да муз майданына чакырган.
Түнкү хоккей лигасы 2011-жылы Путиндин демилгеси менен жана орус хоккейинин ардагерлеринин колдоосу аркасында түзүлгөн. Анын башкы милдети улуу муундагы россиялыктарды спортко тартып, өлкөдө шайбалуу хоккейди кеңири жайылтуу жана Россиянын бардык аймактарын бириктире турган хоккейди сүйүүчүлөр коомчулугун түзүү болчу.
…жана башка спорттук кызыгуулары
Путин спорттун көп түрлөрүн жакшы көргөндүгү менен белгилүү. Алардын алдыңкы катарында дзюдо жана тоо лыжасы турат. Россиянын президенти дзюдо боюнча спорт чебери жана ал боюнча Санкт-Петербургдун бир нече жолку чемпиону, ошондой эле карате боюнча кара курдун ээси. Самбо жана дзюдо менен 11 жашынан бери машыгат. Мамлекет башчысы, ошондой эле, чана-бобслей спортуна да кызыгып, керлинг, автоспорт, бадминтон жана армрестлинг сыяктуу спорттун түрлөрүндө да өз күчүн сынап көргөн.
Путин балык уулоого болгон сүйүүсү менен да белгилүү. 2013-жылы Туванын алыскы аймагында орун алган Токпак-Холь көлүндө 21 килограммдык чортон балыгын кармап алган. 2014-жылы Япониянын премьер-министри Синдзо Абэ Путиндин туулган күнүнө Япониянын Москвадагы элчилиги аркылуу балык уулоо үчүн спиннинг тартуулаган.
Мурдараак Песков айтып бергендей, салт катары Путинге берилген белектердин көпчүлүгү президенттин китепканасында сакталат, бирок тааныштары жана достору тартуулаган белектерди мамлекет башчысы өзүнө калтырат.
