БИШКЕК, 2-окт. — Sputnik. Megacom компаниясын сатуудан өкмөт Ысык-Көлдү айланта жол салууга ниеттенип жатканын жыйын учурунда премьер-министр Темир Сариев билдирди.
Анын айтымында, уюлдук компанияны 100 миллион долларга сатуу пландалууда. Түшкөн каражат жолдорду оңдоого жумшалат.
"Эгер кошумча каражат булагы табылса, Балыкчыдан Тамчыга чейинки 44 чакырым жол салууну көздөп жатабыз. Жалпы жонунан Ысык-Көл облусу боюнча 108 чакырым жолду жаңыртуу каралган", — деди өкмөт башчы.
"Альфа Телеком" ЖАК 2009-жылы түзүлүп, жалгыз ээси Алексей Елисеев болгон. Убактылуу өкмөт 2010-жылы компаниянын 49 пайыз акциясын улутташтырып, 51 пайызы Елисеевге караштуу Southfield Management Inc. и Vesatel Unitеd Limited компаниясынын менчигинде калган. Өткөн жылдын июль айында акциянын 51 пайызына салынган сот бөгөтү алынып, мамлекет акциянын 100 пайызына ээлик кылып калган.
