БИШКЕК, 29-сен. — Sputnik. Акыркы маалда балдардын катышуусу менен жасалган же балдардын өлүмү менен аяктаган кылмыш иштери көбөйүп жатканын вице-премьер Абдырахман Маматалиев тийиштүү жыйында билдирди.
Маалыматка ылайык, акыркы 10 күн ичинде республика аймагында болгон кылмыштардан улам ар кандай курактагы 10 бала көз жумган. Мында вице-премьер Жумгалдагы мушташтан каза болгон 9-класстын окуучусу, жол кырсыгынан каза болгон төрт өспүрүм, Кара-Көл шаарында 6-класстагы окуучу кыздын өлтүрүлүшүнө токтолуп, тергөө иштеринин жүрүшү менен таанышты.
Жыйында ИИМ учурда аталган кылмыштар боюнча тийиштүү ыкчам-иликтөө иштери жүргүзүлүп, бардык экспертизанын түрү дайындалганын, ошондой эле шектүү жарандар камакка алынганын маалымдады.
Жыйын соңу менен Маматалиев тергөө иштерин дыкат жүргүзүү, мындай кылмыштардын алдын алуу боюнча кескин аракеттерди көрүү жана тарбиялык иштерди жүргүзбөгөнү үчүн тийиштүү адамдарды жоопкерчиликке тартуу каралган мыйзам долбоорун даярдоону тапшырды.
