БИШКЕК, 29-сен. — Sputnik. Эгер сот Камчыбек Ташиевдин пайдасына чечим кабыл алса, БШК аны талапкер катары кайра каттоого милдеттүү эмес экенин Sputnik агенттигине комиссиянын мүчөсү Канатбек Азиз билдирди.
Канатбек Азиздин айтымында, Ташиев БШКнын чечимине каршылыгын билдирип, Биринчи Май райондук сотко доо арыз менен кайрылууга укуктуу.
"Эгер сот Ташиевдин пайдасына чечим чыгарса, бул бизди баштапкы абалыбызга кайтарып, маселени жаңыдан карап аны же тизмеге киргизүү же аны каттабай коюуга шарт түзөт. Ал эми Ташиев учурда үгүтчү, партиянын тең төрагасы катары жарышка катыша берсе болот", — деди ал.
Канатбек Азиз, эгер партия шайлоодо жеңишүүүчлөрдүн катарында болуп калса, Ташиевге мандат берилбей турганын айтты.
"Сот БШКны Ташиевди талапкер катары кайра каттоого милдеттендире албайт. Фемида өкүлдөрү комиссиянын чечимин жокко чыгарууга гана укуктуу", — деп белгиледи БШК мүчөсү.
Эгер сот Ташиев боюнча БШКнын чечимин жокко чыгарса, комиссия Жогорку сотко кайрыла турганын кошумчалады ал.
Ал эми "Республика — Ата-Журт" партиясынын ыйгарым укуктуу өкүлү Елена Жылкычиева БШКнын пикирине кошулбай турганын билдирди.
"Негизи Ташиевге карата БШКнын чечимдеринин баары мыйзамсыз. БШК соттун чечимин аткарууга милдеттүү. Эгер сот комиссиянын токтомун жокко чыгарса, БШК бардыгын баштапкы абалга кайтарышы керек. Соттун чечимдерин бардык мамлекеттик органдар аткарууга тийиш. Алар ошон үчүн сот", — деди юрист.
Парламенттик шайлоо алдыда келе жаткан жекшемби күнү өтөт. Ага 14 саясий партиянын катышуусу күтүлүүдө.
