БИШКЕК, 24-сен. — Sputnik. Республикадагы ооруканаларды оңдоо жана жаңыларын салуу үчүн бюджеттен 1 миллиард сом карала турганын премьер-министр Темир Сариев медициналык мекемелерди кыдыруу учурунда билдирди.
Премьер-министр медицина жаатында жылыштар бар экенин, бирок дагы умтула турган бийиктиктер бар экенин белгиледи.
"Ар бир медициналык мекеме инвентаризациядан өтүшү зарыл. Бул кайсы мекеме оңдоого муктаж, кайсынысын толук реконструкциялоо керектигин, кайсы жабдуулар жетишсиз экенин аныктоого жардам берет. Буга өкмөт тарабынан 600 миллион сом бөлүнгөн, сумманы 1 миллиард сомго жеткирүүгө аракеттер жүрүп жатат. Демек, республикада жаңы медицина мекемелери салынып, ооруканалар заманбап жабдуу менен камсыз болот", — деди Сариев.
Жыйын жүрүшүндө айлык акы, кадр жетишсиздиги талкууга алынып, алгач жасала турган иш катары өкмөт башчы медициналык тейлөөнүн сапатын жакшыртуу жана каржылоо маселесин атады.
"Бул чогулуштун жыйынтыгы менен аталган сунуштарды ишке ашыруу боюнча иш-чаралардын планын иштеп чыгуучу жумушчу топ түзүлөт", — деди премьер-министр.
Мындан тышкары, Сариев медициналык тейлөөнүн акысын аныктап макулдашууну Монополияга каршы мамлекеттик теске салуу агенттиги менен Саламаттык сактоо министрлигине тапшырды.
