БИШКЕК, 23-сен. — Sputnik. Жол кайгуул кызматы республикадагы орто мектептердин жанынан өтүүчү жолдорго атайы белгилердин коюлушун жана жол чийиндеринин түшүрүлүшүн текшерип чыкканын аталган мекеме билдирди.
Маалыматка ылайык, жалпысынан 1697 мектеп текшерүүдөн өтүп, анын натыйжасында 375 эскертүү берилген. Мындан тышкары, кошумча 721 жол белгиси орнотулуп, 134 жерге жол чийиндери түшүрүлдү.
"Дагы 2097 белги коюлуп, учурдагы жол белгилеринин теңи алмаштырылышы зарыл. 247 жерге жол чийиндерин түшүрүү каралып жатат. Райондук администрацияларга жана шаар мэрияларына жол белгилерин коюу үчүн акча каражатын бөлүп берүү боюнча 38 сунуш киргизилди", — деп айтылат билдирүүдө.
Жол кайгуул кызматы окуу жайлардын жанынан өтүүчү жолдордогу белгилерди текшерүү иши улантыларын белгиледи.
