БИШКЕК, 7-сен. — Sputnik. Баткен облусундагы 87 айылда жашаган 76 миң киши таза сууга муктаж. Акыйкатчы институтунун Баткен облусу боюнча өкүлчүлүгүнүн маалыматы боюнча, Баткен районунда 22 айыл, Лейлек районунда 9 жана Кадамжай районунда 56 айыл таза суу менен камсыз болгон эмес. Ошондой эле бир катар айыл аймактарында да таза суу көйгөйү курч.
Ак-Турпак айыл аймагындагы 14 айылдын бирөөндө да таза суу жок, бул айыл аймакта 15 миң киши жашайт.
"Калкты таза суу менен касыздоо маселеси көптөн бери эле турат. Анын алдын алуу боюнча өкмөт 2001-жылдан бери эле чара көрүп келет, бирок бүгүнкү күнгө чейин алгылыктуу иштер жок", — деп айтылат Акыйкатчы институту тараткан билдирүүдө.
Ошондой эле, адамдардын таза сууга жетүүгө болгон укугун камсыздоо боюнча мамлекет тараптан системалык чаралар көрүлгөн эмес.
Акыйкатчы институту бул көйгөйлөр боюнча тийиштүү органдарга, анын ичинен Жогорку Кеңеш менен өкмөткө сунуш жөнөтөт.
