БИШКЕК, 7-сен. — Sputnik. Молдованын оппозициялык Социалисттер партиясынын (МОСП) лидери Игорь Додон Кишиневдо "олигархиялык бийликке" каршы чыгып жаткан DA жарандык кыймылын колдоп, бирок алардын Европаны жактоочулук көз караштарын тең бөлүшпөй турганын билдирген.
DA платформасы ар кандай саясий көз караштагы бир нече коомдук уюмдарды, саясат таануучуларды, коомдук ишмерлерди бириктирип турат. Алардын арасында Молдованын Румынияга кошулушун жактагандар да бар. Май-июнь айларында DA Кишиневдун борборунда массалык митингдерди өткөрүп, акцияга катышкандар коррупцияга каршы күрөшүүнү жана өкмөттүн кетишин талап кылган. Кыймылдын бөтөнчөлүгү анын конкреттүү лидеринин жоктугунда. Платформанын катышуучулары өлкөнүн бийлиги олигархтарга баш иет жана Европага кошулуу процессин калп эле жүргүзүмүш болуп жатат деп билдиришет.
"Социалисттер өз саясий күн тартибине ээ жана партия өзүнүн нааразылык акцияларын жүргүзөт. Молдованын келечеги жөнүндө биздин көз карашыбыз DA платформасын уюштуруучуларыныкынан башка. Биз НАТОго кирүүгө жана Европа биримдигине кошулууга каршыбыз, биз Румыния менен бириккенге да макул эмеспиз. Бирок саясий көз караштардын күрөшү мөөнөтүнөн мурунку парламенттик шайлоонун алкагында аякташы керек. Бирок азыр шайлоого чейин DA платформасы менен бир идеяларды жана "Олигархтар жоголсун!", "Мөөнөтүнөн мурунку шайлоо!" ураандарын колдойбуз", — деп жазат саясатчы дүйшөмбүдө өзүнүн Facebook баракчасында.
Өлкөнүн парламентинде 101 депутаттык мандаттын 25ине ээ оппозициялык партиянын лидери МОСП мөөнөтүнөн мурда шайлоо өткөрүүгө жана өлкөнүн президентин түз шайлоо процедурасын кайра кайтарууга дайыма чакырып келгенин айтат.
Нааразылык бүтүндөй өлкөнү кучагына алганын, жекшемби күнү Кишиневдо шайлоочулар анын бир гана очогун көргөнүн кошумчалады Додон.
