БИШКЕК, 10-июль — Sputnik. Өзгөчө кырдаалдар министри Кубатбек Боронов Баткен облусуна иш сапары менен барып, табигый кырсыктардан жапа тарткан аймактардын абалы менен таанышып чыкканын мекеменин маалымат кызматы билдирет.
Маалыматка ылайык, министр 8-июлда Зарташ, Чоңгара, Чогорок, Галача жана Актурпак айылдары жайгашкан Сох дарыясынын жээгиндеги абалды көрдү. Буга чейин суу каптоонун алдын алуу үчүн Зарташ айылын бойлото узундугу 130 метр тосмолор курулуп, дагы кошумча 150 метр тосмо куруу керектиги аныкталган.
Баткенге болгон иш сапарынын алкагында министр тийиштүү адистерге табигый кырсыктардын кесепеттерин тереңдетип жиберген себептерди тыкыр изилдөөгө алууну буюрду.
"Өз убактысында жасалбаган коргоо иш-чаралары, арыктарды, сугаруучу каналдарды колдонуудагы жашоочулардын шалаакылыгы масштабдуу кыйроолорго, айрым учурда адам өлүмүнө алып келүүдө", — деди Боронов.
Иш сапар алкагында Кызыл-Кыя шаарында, Кадамжай жана Баткен райондорунда катталган табигый кырсыктардын кесепетин жоюу боюнча бир катар чечимдер кабыл алынды.
