БИШКЕК, 10-июнь — Sputnik. Өзгөчө кырдаалдар министри Кубатбек Боронов нөшөрлүү жаандан жана селден жабыр тарткан Лейлек районунун айыл тургундары менен жолукканын мекеменин маалымат кызматы билдирет.
Кырсык болгон аймакка ӨКМдин 30 кызматкери тарабынан жардам иретинде 60 чатыр, 50 комплект ашкана буюму, 250 жууркан жеткирилген.
Министр Кулунду, Раззаков, Ак-Суу, Сумбула жана Бешкент айыл амактарында болуп, абал менен таанышты.
Боронов ӨКМ структуралык жана аймактык бөлүмдөрүнүн жетекчилерин Бешкент айыл аймагындагы таза жана сугатка пайдаланылуучу суу системасын, ошондой эле жол байланышын калыбына келтирүүгө милдеттендирди.
"Жакын арада турак үйлөрдүн жараксыз деңгээлин аныктоо, келтирилген материалдык зыянды эсептөө, жолдорду жана суу системаларын калыбына келтирүү зарыл", — деди Боронов.
Бешкент айыл аймагында министрликтин күчү менен кырсыктан улам жараксыз абалга келген фельдшердик-акушердик пункттун ордуна жаңысы салынары белгилүү болду.
