БИШКЕК, 5-янв. — Sputnik. Ирландиялык мушкер Конор Макгрегор россиялык чемпион Хабиб Нурмагомедов андан коркуп, ошондон улам реваншты каалабай жатканын жар салды. Бул тууралуу MMA Fighting билдирди.
Макгрегордун айтымында, аралаш мушташтын бардык күйөрмандары Хабиб менен Конордун беттешин көргүсү келет.
"UFC жетекчиси, биз, Хабибден башкасынын баары каалайт. Ал менден коркот. Өмүр бою качып жүрө бере алат, бирок жашынып кала албайт. Биздин беттешти күтөм", — деген мушкер.
Макгрегор акыркы ирет октагонго 2018-жылы 6-октябрда чыгып, Хабиб Нурмагомедовго утулуп калган. Ошондон бери ал реванш самап, ыңгайы келген жерде бул тууралуу айтып келет.
Белгилей кетсек, ирландиялык мушкер 18-январь күнү америкалык Дональд Серроне менен Лас-Вегаста жолугат. Ал эми Хабиб Нурмагомедов 19-апрель күнү АКШда Тони Фергюсон менен жолугуп, UFC чемпиону деген наамын коргомокчу.
