БИШКЕК, 19-дек. — Sputnik. Мамлекеттик мүлктү башкаруу фондусунун төрагасы Дүйшөнбек Зилалиев ИИМдин курсант кызына эмне деп айтканын Sputnik Кыргызстан агенттигине билдирди.
Буга чейин бир катар ЖМКлар инаугурация күнү укук коргоо органдарынын кызматкерлери Чыңгыз Айтматов проспектиси менен Москва көчөлөрүнүн кесилишинен жарылуучу каражатты издешкен. ИИМ Академиясынын курсантынын айтымында, ага бомба тууралуу маалыматты Зилалиев маалымдаган.
Зилалиев курсант кыз анын айткандарын жакшы укпай, сөздү түшүнбөй калганын айтат.
"Жолдо форма кийген кыз турган. Анын кокардасы кыйшайып калганын көрдүм. Терезени түшүрүп "чоң кыз, сизге форма жарашат экен бирок кокардаңызды оңдоп коюңуз" деп айткам. Ал "Азыр бомба жарылат" деп угуптур. Кийин ал кыз менен жолугуп, окуя боюнча сүйлөшкөнбүз. Бул көрүнүш жумурткадан кыр издегендей эле болуп калды", — деди ал.
"Мен дагы курсант кезде кышпы, жайбы, жаанбы, ысыкпы дебей жолду кайтарып турчумун, алардын эмгегин баалайм", — деди ал.
Мүлк фондусунун башчысы бул окуя ниети каралардын берген тапшырыгындай элес калтырарын билдирди. Ал ошондой эле айрым журналисттер маалыматты жазып жатканда анын көз карашын сурабаганын айтты. Коом арасындагы терс пикирлерден улам ата-энеси кыйналганын кошумчалады.
