БИШКЕК, 16-ноя. — Sputnik. Өкмөт Кыргызстандын аймагындагы көмүрдүн баасын үч ай бою жөнгө салып турат. Бул тууралуу өкмөттүн сайтына жарыяланды.
Тиешелүү токтомго премьер-министр Сапар Исаков бейшемби күнү кол койгон.
Буга чейин Экономика министрлиги элди көмүр менен жеткиликтүү баада камсыздоо курч маселе бойдон калып жатканын билдирген. Жүргүзүлгөн мониторингдин жыйынтыктары акыркы айларда айрым аймактарда (20 пайыз) көмүрдүн баасы кескин кымбаттап кеткенин көрсөткөн.
Экономика министрлиги буга кыргыз-казак чек арасындагы көйгөйлөр себеп экенин маалымдаган.
Эми мамлекет кара алтынга болгон бааларды 90 күн бою жөнгө салып турмай болду. Монополияга каршы күрөшүү органына тиешелүү тапшырмалар берилген. Токтом мыйзамдуу түрдө күчүнө кирди.
