БИШКЕК, 13-ноя. — Sputnik. Ош облусунда Сүлүктү көмүрүнүн баасы 12 миң 500 сомго чыкканын Sputnik Кыргызстан агенттигине жергиликтүү кабарчы билдирди.
"Суук түшкөнгө чейин бул көмүрдүн килограммы 8-9 сомдон сатылып жаткан. Учурда анын баасы 12 сом 50 тыйынга жетти", — деп айтылат билдирүүдө.
Ал эми Алай көмүрүнүн бир тоннасы 3,5 — 4 миң сомдон сатылууда.
Кыргызстандын башка аймактарындагы баалар төмөндөгүчө:
Нарын облусунда — көбүнесе Турук кенинин көмүрү сатылат. Тоннасы — 3-3,5 миң сом;
Чүй жана Бишкекте — ушул тапта Кара-Кече көмүрү көбүрөөк. Тоннасы — 3,7-4,3 миң сомдон;
Талас облусунда — Жамбылдан алып келинген көмүр басымдуулук кылат. Тоннасы — 5-6 миң сом;
Жалал-Абад облусунда Таш-Көмүр кенинин продукциясы көп сатылат. Тоннасы — 5,5-6,5 миң сомго бааланып жатат;
Ысык-Көлдүктөрдүн басымдуу бөлүгү Кара-Кече жана Жыргалаңдын көмүрүн алат. Учурда ал жактагы кара алтындын наркы тоннасына 4 миң сомдон 6,5 миң сомго чейин бааланууда.
Эске салсак, өткөн аптапа Экономика министрлиги "КР аймагындагы көмүр баасын мамлекет тарабынан жөнгө салуу боюнча" токтом долбоорун иштеп чыгып, коомдук талкууга койгон.
Ага ылайык, элге жеткиче асмандап кетип жаткан көмүрдүн чекене баасын өкмөт 90 күн бою көзөмөлдөп турат. Токтом долбоорун министрликтер карап чыгып, өкмөткө жөнөтүү алдында турганын Экономика министрлигинен билдиришти.
