Назаровдун кызы жабыркаган жол кырсыктан эки милиция иштен четтетилди

БИШКЕК, 4-сен. — Sputnik. Борбор калаадагы мотоциклдин катышуусу менен болгон жол кырсыгынан кийин эки милиция кызматкери тергөөгө карата кызматынан четтетилди. Бул тууралуу Бишкек ШИИБден билдирди.

Эскерте кетсек, 17 жаштагы Аделина Назарова 19-августтун түнүндө Бишкектин чок ортосунда болгон жол кырсыгынан жабыркаган. Ал жеңил автоунаа менен кагышкан мотоциклдин артында отурган. Мотоциклди айдап бараткан 21 жаштагы бала каза болуп, машинанын ичиндеги кишилер түрдүү жаракаттар менен ооруканага жеткирилген. Кийинчерээк бир жүргүнчүсү каза тапкан.

Окуянын күбөлөрү мотоциклди Кайгуул милиция кызматкерлери кууганын Sputnik Кыргызстан агенттигине билдиришкен. Алардын айтымында, мотоцикл катуу ылдамдыкта бараткандыктан жеңил унааны кагып алган.

Ал эми Кайгуул милиция башкармалыгынын маалымат кызматы кайгуулчулар саат 1.30дар чамасында мотоцикл Тоголок Молдо көчөсү менен катуу ылдамдыкта баратканын көрүшкөнүн маалымдаган.

"Аталган факты боюнча тергөө жүрүп, эки милиция кызматкери убактылуу иштен четтетилди. Алар кайсы кадамы үчүн жаза алганы аталган окуя боюнча прокуратура юридикалык баа бергенден кийин айтылат", — деп башкармалыктан белгилешти.

Эскерте кетсек, кырсыкка кабылган кызына кан керек болгон учуруда Назаров элге жардам сурап кайрылган.