БИШКЕК, 24-авг. — Sputnik. Бишкектин чок ортосунда мотоцикл менен кагышкан жеңил унаанын жүргүнчүсү каза болду. Бул тууралуу Sputnik Кыргызстан агенттигинин кабарчысына Кайгуул милициядан маалымдашты.
Эскерте кетсек, 19-августка караган түнү болжол менен саат 1.30дарда Чүй проспектиси менен Тоголок Молдо көчөсүнүн кесилишинде мотоцикл менен Toyota Passo унаасы кагышып кеткен.
Мотоциклдин 21 жаштагы айдоочусу ошол эле каза болсо, жеңил машинанын ичиндеги үч адам ооруканага жеткирилген.
"Toyota унаасынын 23 жаштагы жүргүнчүсү 19-августта каза болду. Ал жеңил автонун алдыңкы орунтугунда отуруп келе жаткан", — дешти милициядан.
Мотоциклдин жүргүнчүсү да оор жаракат алып, ал бокс боюнча дүйнөнүн жети жолку чемпиону Орзубек Назаровдун кызы экени маалым болгон.
17 жаштагы Аделина коомага түшкөн абалда Бишкек шаардык травматология жана ортопедия илим изилдөө борборуна жеткирилген. Назаров анын кызына кан керек болуп жатканын айтып, коомчулукка жардам сурап кайрылган.
Окуянын күбөлөрү мотоциклди Кайгуул милиция кызматкерлери кууганын Sputnik Кыргызстан агенттигине билдиришти. Алардын айтымында, мотоцикл катуу ылдамдыкта бараткандыктан жеңил унааны кагып алган.
Ал эми Кайгуул милиция башкармалыгынын маалымат кызматы кайгуулчулар саат 1.30дар чамасында мотоцикл Тоголок Молдо көчөсү менен катуу ылдамдыкта баратканын көрүшкөнүн маалымдады.
"Милиционерлер ошол багыт боюнча баратып жол кырсыгы катталганын көрүшкөн", — деп башкармалыктан белгилешти.
Учурда аталган факты боюнча кылмыш иши козголуп, кызматтык териштирүү жүрүп жатат.
