БИШКЕК, 16-авг. — Sputnik. Бишкек шаарындагы түнкү клубга келген чет элдик кардар администратор кызга кол көтөрүп, көкүрөк тушка муштады. Маалыматты Sputnik Кыргызстанга администратор өзү тастыктады.
Жабырлануучу ошол эле күнү Ленин райондук милициясына арыз жазып, ага кол көтөргөн жаранды да алып барган. Бирок ал тиешелүү жазасын албаганына нааразы болууда.
Окуя 3-августтун таңында болгон. Кызды урган учуру клубдун видеобайкоосуна тартылып калган.
"Башында европалык жаран бир кыргыз киши менен келип барда ичип отурушкан. Анан эле чет элдик киши бут кийимин чечип ортого чыгып бийлей баштады. Башка кардарлар аны жактырбай даттанышты. Мен барып бут кийимин кийип алышын сурандым. Бирок ал "мага баары болот" дегендей кылды. Бул жерде баарына бирдей мамиле жасаларын айтсам, мени жаман көрүп атып бут кийимин араң кийди. Андан соң ал сахнага чыгып алды, ал жакка өтүүгө бизде тыюу салынган", — деди администратор.
Ошол учурда жанындагы кыргызстандык шериги администратордон такси чакырып беришин суранган. Ал сыртта турган таксилерди сүйлөшүп бергенин айтат.
Окуядан кийин администратор кыз дем алуусу кыйындап, муштум тийген жери оорутканынан медициналык кароодон өтүп, үй шартында дарыланып жатканын билдирди.
Ленин райондук милициянын маалымат кызматы бул иш боюнча маалыматты бир аздан кийин берүүнү убадалады.
