БИШКЕК, 16-авг. — Sputnik. Бишкектеги соода борборлордун биринде сатуучу кызды калькулятор менен башка чапкан 29 жаштагы А.А. аттуу жарандын бөгөт чарасы тандалды.
Октябрь райондук сотунан билдиришкендей, А.А. Бишкек шаарындагы №1 тергөө абагына бир айга киргизилди.
13-август күнү бул жаран шаардык милициянын убактылуу кармоочу жайына 48 саатка камакка алынган. Андан соң анын бөгөт чарасын Октябрь райондук соту карай турганы маалымдалган.
Эске салсак, окуя 2-август күнү Горький жана 7-Апрель көчөлөрүнүн кесилишиндеги соода борборунда болгон. Арыз жазган кыздын айтымында, ал күнү бейтааныш эркек киши мас болуп алып, аны менен урушуп, сөгүнгөн. Чатакташып жатканда калькулятор менен башка чапкан.
Аталган факт алгач Кылмыш жана жоруктардын бирдиктүү реестрине Жоруктар кодексинин 119-беренеси ("Майда бейбаштык") менен каттоого алынган. Бирок кийин иш кайра 266-беренеге ("Бейбаштык") өзгөртүлгөн.
