БИШКЕК, 20-ноя. — Sputnik. Аксы районуна караштуу Жаңы-Жол айылында окуучу кыздар катышкан массалык мушташ катталды. Бул тууралуу Жалал-Абад облустук ички иштер башкармалыгынан кабарлашты.
Мамытбеков атындагы мектепте окуган 10-11-класстагы кыздар 18-ноябрь күнү саат 17:30дар чамасында мушташышкан. Алдын ала маалыматка караганда, кыздар кер-мур айтыша кетип, маселени чечишип алуу үчүн мектептин аймагынан чыгып кетишкен.
Массалык мушташтын күбөлөрү окуяны видеого тартып алып соцтармакка жарыялашкан. Кадрдан 25-30дай кыз айтышып жатканын көрүүгө болот. Бир нече убакыттан кийин алардын жарымы мушташса, жарымы карап турган. Жабырлануучулар боюнча азырынча маалымат жок.
Аталган факт Кылмыш жана жоруктардын бирдиктүү реестрине Кылмыш-жаза кодексинин 266-беренеси ("Бейбаштык") боюнча каттоого алынды.
Учурда укук коргоо органдарынын өкүлдөрү мушташтын катышуучуларын издеп жатат.
