БИШКЕК, 13-авг. — Sputnik. Ысык-Көлдөгү спорттук иш-чара учурунда диний пикир келишпестиктен улам сабалган баланын үй-бүлөсү Россияга көчүп кетүүнү көздөп жатат. Бул тууралуу анын ата-энесине шилтеме берип "Комсомольская правда" гезити жазды.
Окуя ушул жылдын июнь айында Булан-Сөгөттү айылында өткөн дзюдо боюнча машыгуу учурунда болгон. Жабырлануучу тараптын жактоочусунун айтымында, тогуз жаштагы баланын диний көз караштарынан улам башка балдар аны мазакташкан. Кийин арданган бала аларга таш ыргыткан. Мындан улам баланы ур-тепкиге алышкан. Текшерүү үчүрунда ал жеңил жаракат алганы белгилүү болгон.
Гезиттеги маегинде баланын ата-энеси мурда Россияга көчүп кетүүгө аракет кылганын, бирок кагаз иштерине байланыштуу бюрократиядан өтө албай койгонун айткан.
"Биз бардык этаптарды өттүк. Россиянын консулдук бөлүмүнүн өкүлдөрү менен жолукканбыз. Менимче, системаны жеңилдетип койсо деле болчудай экен", — деген баланын атасы.
Анын айтымында, көпчүлүк кишилер дал ушул документтерди ырастоо маалындагы көйгөйлөрдөн улам көчүп кетүүдөн баш тартышат.
