БИШКЕК, 13-авг. – Sputnik. Мамлекет башчы Садыр Жапаров “Жер участокторун которуу (трансформациялоо) жөнүндө” мыйзамга өзгөртүүлөрдү киргизүүнү караган мыйзамга кол койду. Бул тууралуу президенттин маалымат кызматынан билдиришти.
Документ турак жай куруу пландаштырылбаган жер участокторуна үй куруп алган жарандардын көп жылдан берки көйгөйлөрүн чечүүгө багытталган.
“Маселен, мыйзам менен жол-жоболорду түшүндүрүү жана кайрыла турган органдарды тактоо аркылуу жер участокторуна документтерди алуу тартиби боюнча көйгөйлөр чечилүүдө. Өлкөдө жарандардын жашоосуна кандайдыр бир деңгээлде таасирин тийгизген экономикалык кырдаалга, баалардын өсүшүнө, пандемияга байланыштуу жарандардын жашоо-турмушунда келип чыккан кыйынчылыктарды эске алуу менен бул мыйзам жарандарды айыл чарбадагы жоготууларга байланыштуу компенсацияларды төлөөдөн бошотот”, – деп айтылат маалыматта.
Белгилей кетсек, ушул кезге чейин жер участокторун трансформациялоодо турак жайларды куруп алган жер тилкелеринин ээлери айыл чарба жоготууларын жана алынбай калган пайданы төлөшү керек болчу.
Ошондой эле мыйзам менен жаңы конуштардын инфратүзүмүн жакшыртуу боюнча демилгелер трансформацияланган жерлердин ээлерине өткөрүлүп берилет.
Аталган мыйзам бүгүнкү күндөн тарта күчүнө кирет.
Белгилей кетсек, өткөн жылы ноябрда Садыр Жапаров 1 712 гектар жерди трансформациялоо мыйзамына кол койгон. Муну менен айыл чарбасында колдонууга жараксыз, сугат жерлерине бөлүнгөн аянттарга үй курган 11 300 үй-бүлөнүн социалдык көйгөйлөрү чечилери айтылган.
Ага ылайык, 2009-2018-жылдары айыл чарбасында колдонууга жараксыз жана жеке менчик укугуна мамлекеттик күбөлүгү бар айдоо аянттарынын бөлүнүп берилген жерлерине үй курган кыргызстандыктардын көйгөйлөрү чечилет. Мыйзам бул жерлерди трансформациялоого мүмкүнчүлүк берет.
