БИШКЕК, 26-дек. — Sputnik. Бүгүн, 26-декабрда, Бишкектеги Шаардык муз аянтында көркөм муз тебүү боюнча "Кышкы жомок - 2020" аталыштагы мелдеш жыйынтыкталды. Аны Кыргызстандын Коньки тебүү спорту федерациясынын алдындагы Көркөм муз тебүү мектеби өткөрдү.
Мелдеш жаш спортчулардын даярдыгын текшерүү максатын көздөгөн. Анда спорттун чеберине талапкерлер жана жаш фигуристтер өз номерлерин аткарып, калыстардын сынынан өтүштү.
Аталган мелдеш март айына пландаштырылып, ага кошуна Казакстан, Россия өлкөлөрүнөн да чакырылган. Пандемиядан улам мелдеш өтпөй келген. Машыктыруучулар бул өз кезегинде жаш спортчуларга кедергисин тийгизерин айтышууда.
Мелдештин башкы калысы, көркөм муз тебүү мектебинин башкы машыктыруучусу Елена Швеймер спортто атаандаштык болушу керектигин, анткени баары жетишкендикке умтулушарын Sputnik маалымат агенттигине айтты.
"Мелдештин өткөнүнө кубанып турабыз. Балдар көп убакыттан бери мелдешке чыкпагандыктан дээрлик баары толкунданып жатышканы байкалып турду. Жалпысынан жыйынтык бизди канааттандырат. Бүгүн бир да спортчу 100 пайыздык даярдык көрсөтө алган жок. Анткени көптөн бери жетиштүү машыгуу болгон жок. Мындан сырткары, жалпы машыгуу башталганда айрымдары жаракатынан, ал эми кээ бири ооруп калып толук кандуу машыга албай калышты. Деген менен биз мелдешти өткөрдүк. Бул эң башкы жетишкендик", — деди Швеймер.
Жарышта башталгыч этаптагы жаш фигуристтерден тарта спорттун чебери наамына талапкерлерге чейинкилер өз өнөрүн тартуулап, мыктылыгына жараша орундарды ээлеп, сыйлыктарды алышты.
