Кар жаткан ашууда электриктер үч күн иштеп, бузулган линияны оңдоду. Сүрөт

БИШКЕК, 2-июн. — Sputnik. "Кыргызстан улуттук электр тармагы" ишканасынын Нарындагы энергетиктери 3000 метр бийиктиктеги кар тоңгон Сары-Кыр ашуусуна чыгып барып, электр өткөрүүчү линияны оңдошту. Бул туурасында аталган компаниянын маалымат кызматынан кабарлашты.

Бузулган тилке Нарын, Жалал-Абаддын жогорку чыңалуудагы электр тармактары ишканасына карайт. Урумбаш-Жетиген деп аталган 110 кВт бөлүгү марттын соңунда эле катуу шамал менен борошологон кардын кесепетинен иштен чыкканы айтылды.

"Ашууга аба ырайынын катаал шартынан улам жетиш кыйын болуп, жай келип катып калган кар катмарлары бир аз жибий баштаганда электриктер ишти баштаган. Сары-Кырга жетиш үчүн жолду тазалоого эки күн кетти. Ал эми электр линиясынын иштен чыгып калган жерин үч күн издеп, кечээ, 1-июнда, Урумбаш-Жетиген кайрадан иштей баштады", — деп айтылат маалыматта.

Бул ишке атайын беш техника жана аталган ишкананын Нарындагы филиалынын бригадасы тартылган.