БИШКЕК, 28-апр. — Sputnik. Талас облусунда коргонуу чаралары жакшы жүрүп, чет жактан жугузуп келгендер Бишкектен аныкталууда. Бул туурасында саламаттык сактоо министринин орун басары Нурболот Үсөнбаев брифинг учурунда билдирди.
Жыйында модератор Таласта бир да учур катталбаганынын себебин сураган.
“Ал жакта чет жактан келгендер, оору жугузгандар менен байланышкан адамдар дагы болгон. Бирок көп учурда облустун тургундары Бишкектен обсервацияга алынып, эгер коронавирус аныкталса, бул жакта кармап калууга жетиштик деп айтсак болот. Экинчиден, алар талаптарды так аткарганга аракет кылып катуу көзөмөл жүргүзүштү. Облустук штаб жакшы иш алып барууда десек болот. Ошонун натыйжасында бүгүн Таласта абал ушундай”, — деди Үсөнбаев.
Белгилей кетсек, азыркы тапта өлкөнүн алты облус, төрт шаарында илдетке кабылгандар тастыкталган. Талас облусунда гана бир да учур катталган эмес.
Коронавирустун кесепети
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
