БИШКЕК, 21-апр. — Sputnik. Саламаттык сактоо министринин орун басары Мадамин Каратаев маалымат жыйын учурунда коронавирус менен күрөшүүдө эмнеге Ош шаарына көп күч келип жатканын түшүндүрдү.
Анын айтымында, Ошто Жалал-Абад менен Баткендин тургундарынын дагы лабораториялык анализдери чыгып жатат.
“Биз Ош облусу, шаары боюнча коронавирус жуктурган жана байланышта болгондордун бүт баарын тактадык. Жаңы учурлар ошонун ичинен чыгууда. Бүгүн ПЦР-анализдердин баарын бүтүрөбүз. Эмне үчүн Ошко күч келип жатканын түшүндүрөйүн, Жалал-Абад менен Баткенден анализ жасаганга үлгүрбөй, бул жакка жөнүтүп жатышат. Буга чыдап, медицина кызматкерлери да түшүнүп жатат”, — деди Каратаев.
Ошондой эле ал Ош шаарында катталган 93 учурдан 36сы медицина кызматкери экенин белгилеп, оорукана жетекчилерин коргонуу чараларына дыкат көңүл бурууга чакырды.
“Жумушка жоопкерчилик менен мамиле кылып коргонуучу шарттарды түзсөк. Эпидемиологиялык абал боюнча буйруктар, алгоритмдер бар. Ошону оорукананын жетекчилери, медицина кызматкерлери кунт коюп окуп, бардык эрежелерди сактасак, бул абалдан чыгып кетебиз”, — деп кайрылды министрдин орун басары.
Белгилей кетсек, соңку маалымат боюнча Ош шаарында 93, облусунда 150 адам COVID-19 жугузган. Арасында сакайып чыккандары дагы бар.
Коронавирустун кесепети
Кыргызстанда коронавирус жуктуруп алгандардын саны 590го жетти. Анын ичинен 216сы айыгып, жетөө каза болду. Ошондой эле 147 медицина кызматкери да оору менен алышууда.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Мындан тышкары, Sputnik Кыргызстан редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.
