БИШКЕК, 21-апр. — Sputnik. Ош шаарында коронавирустун белгилери байкалганда дарыгерлерге кайрылбай жүрө берип, үй-бүлөсүнө дагы вирус жугузган кишиге иш козголду. Бул туурасында Ош шаары жана Ноокат, Кара-Суу райондору боюнча комендант Малик Нурдинов маалымат жыйында билдирди.
Анда модератор “Ош шаарынын Калинин конушунда Россиядан келген жаран коронавирус жуктурганын жашырып жүрөт” деген маалыматты тактап беришин сурады.
Комендант ал жаранга карата кылмыш иши козголуп, Жазык кодексинин 280-беренесинин негизинде жоопкерчиликке тартыларын айтты.
“Ал Россиядан ушул айда келген экен. Биз “ооруну жашырса, өлүм ашкере кылат” деп канчадан бери айтып жатабыз. Бул дал ушундай абалга туш келди, медициналык кароодон өтпөй, бала-бакырасы менен карым-катнашта жүрө берген. Мунун айынан үй-бүлө мүчөсүнө жугузган, дагы 10 адам обсервацияга алынды. Башка дагы ким менен байланышта болгонун тактап жатабыз. Жарандарга кайрылып кетейин, эгер кандайдыр бир шек жаралса, дарыгерге кайрылууга милдеттүсүздөр”, — деди Нурдинов.
Ошондой эле комендант бүгүнкү күндө ооруп жүргөнүн жашырган үч адамга кылмыш иши козголгонун белгиледи.
Соңку маалымат боюнча, Ош шаарында 93, облуста 150 адам COVID-19 жугузган. Арасында сакайып чыккандары дагы бар.
Коронавирустун кесепети
Кыргызстанда коронавирус жуктуруп алгандардын саны 590го жетти. Анын ичинен 216сы айыгып, жетөө каза болду. Ошондой эле 147 медицина кызматкери да оору менен алышууда.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Мындан тышкары, Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.
