Садыр Жапаровдун тарапкерлеринин Бишкектеги митинги. Онлайн-репортаж

 Милиция Садыр Жапаровдун боштолушун талап кылып митингге чыккандарды болжол менен 40 мүнөттүн тегерегинде митинг уюштурулган аймактан сүрүп чыкты. 

Бул аймактагы көчөлөрдөгө асфальт жолдон жерде жаткан муштумдай таштарды, көлөмү андан чоңураактарын, цементтин сыныктарын көрүүгө болот. Ал арада бул маршруттан жолдо турган автоунаалардын кээ бирлеринин айнектери талкаланды.  

Москва-Логвиненко көчөлдөрүндө милиция кызматкерлери менен кошо атайын даядыктагы аскерлер жүрөт. Митингчилер таш ыргытканга жетишип жатат. Ал эми жөнөкөй жарандар баш калкалаган жай издеп жатат. 

Милиция менен митингчилердин каршылашуусу Орозбеков менен Киев, Токтогул көчөлөрүндө болду. Ал жерде митингчилер милицияга бир топ каршылашты. Алар тартип сакчыларга таш менен каршылык көрсөтүп жатканын көрүүгө болот. Нааразылыкка чыккандар бир топ каршылык кылышты. Милиция акырындык менен аларды аймактан сүрүп чыгып бара жатат. 

Учурда саат 18:41. Негизги кыймыл, тагырагы сүрүп чыгаруу Раззаков көчөсүндө, андан сырткары аянттын айланасындагы Киев көчөсүндө болууда. 

Чогулгандар милицияны жарып өтүп, Ак үйгө келди. Ал эми тартип сакчылары мамлекеттеги башкы страгиялык объектини коргоого аракет кылып жатат. 

Аянтка чогулган эл Ак үйдү көздүй жөнөдү. Алардын кыйкырып, ышкырып бара жаткандыгын көрүүгө болот. Бара жаткандар Жапаровду бошотуп берүүнү талап кылабыз дешти. 

Ак үйдүн, Кыргыз драма театрынын жанындагы милиция кызматкерлери менен "Ала-Тоо" аянтындагы чогулган элдин арасын бир нече метр гана аралык бөлүп турат. 

Ал арада аянтта тургандарды уюштуруучулар тарап кетишин суранууда. Бирок элдин арасынан кептейбиз деген үндөр чыгууда. 

Чыгып сүйлөгөндөрдүн бири бийликке жарым саат берерин, болбосо Садыр Жапаровду бошотуу үчүн түрмөгө бара тургандыктарын айтып, элди чакырды. 

Садыр Жапаровдун агасы Сабыр Жапаров элге кайрылды. Анын "Келгениңерге чоң рахмат. Сөөгүбүз ыраазы силерге. Чагымчылыкка тарабай тынч тарап кетсек" деген сөзүн чогулгандар укпай, кыйкырып, ышкырып башташты.

Элдин арасынан "тарбайбыз" деген үндөр чыкты.

 Сүйлөп жаткандардын бири милиция чогулгандарды таратып, кубалоо туурасында маалымат болуп жаткандыгын айтты. Эл акырындап Манастын эстелигинин алдына, сүйлөп жаткандарды көздөй жылды. Ал арада Раззаков көчөсүндө милиция кызматкерлери түшкөн автобус келди. Дагы эки техника турганы айтылды.

Митингдин делегаттары менен жолуккан президенттин Аппаратынын Жарандардын кайрылуулары менен иштөө бөлүмүнүн башчысы Саякбай Субанов келгендердин пикирин уккан.         

"Жарандардын кабыл алууларын кароонун тартиби жөнүндө мыйзамдар боюнча түшүндүрмөлөр берилди. Митингдин резолюциясы келгенден кийин ал президенттин Аппаратынын тиешелүү түзүмдүк бөлүмдөрүндө карала тургандыгы белгиленди", - деп айтылган маалыматта.

Чыгып сүйлөгөндөрдүн бири элди аянтта чачырабай, бири-бирине жакын турууга чакырууда. Топтолушуп турууну айтты. Андан сырткары Каптагаевди, Садыровду алып келишин, депутаттардын, анын ичинен Өмүрбек Текебаевдин чыгышын талап кылды. 

Топтошкон элдин бир бөлүгү Орозбеков көчөсүменен өкмөт үйүн, Абдымомунов көчөсүн көздөй жөнөдү. Уюштуруучулардын кайрылуусунан улам бир бөлүгү кайтып келди. Кээ бирөөлөрдүн  айтымында чатак чыгарууга аракет кылгандарды четке сүрүп салышты. 

 Автоинспекторлор Раззаков көчөсүндөгү автокыймылды жапты.  "Ала-Тоо" аянтында Садыр Жапаровдун колдоочулар уюштурган митингдин башталганына 3 сааттан ашты. 

Садыр Жапаровдун колдоо митингинен тартылган видео. 

Трибунадан чыгып сүйлөгөндөрдүн аягы жакында үзүлчүдөй эмес. Облустардан тышкары, райондордон келдик деген жарандар чыгып сүйлөп жатат. Алардын бир тобунун кайрылуусу президент Сооронбай Жээнбековго кайрылып жатышканын угууга болот. 

Президентке жолугууга баргандарды Ак үйгө киргизишкен жок.
Президенттик аппараттын Кайрылуулар менен иштөө бөлүмүнүн жетекчиси Саякбай Субанов чыгып президенттин атынан кайрылуусун угуп, жеткире турганын айтты. Бирок буга алар макул болушкан жок. Жээнбековдун өзү кабыл кылышын талап кылып, көпкө чейин талашып тартышты. Натыйжада Субанов Садыр Жапаровдун иниси Сабырды жана эки аксаксалды кабыл алышын сурап көрөрүн айтты. Ошентип Ак үйгө келгендер саат 17.00гө чейин жооп күтөрүн айтып,  артка кайтышты.

Митингдин расмий башталганына 1,5 саат болду. Акция негизинен тынч өтүүдө. Милиция абалга көз салып турат. Уюштуруучулар чогулгандарды ар кыл чагымчыл кадамдарга алдырбоого, коомдук тартипти сактоого чакырды.        

Кыргызстандын ар бир облустарынан, райондорунан келдим деген кыргызстандыктар сүйлөп жатат. Алардын бир даары Жапаравдун акталышын талап кылса, алардын кээ бирлери азыркы бийликти сындап, бир топ көйгөйлөрдү көтөрүштү.  

Трибунага кайрадан ырчы Сагымбек Момбеков  чыгып, "Сат, сат" деп аталган ырын аткарып жатат. 

Митингчилердин алдына чыгып ырчы Сагымбек Момбеков комуз менен ырдады.  

"Ала-Тоодо" сөз берилип сүйлөп, өзүн Талас облусунун өкүлүмүн деп атаган киши президент Сооронбай Жээнбековдон тогуз кишин кабыл алууну суранды.

Алардын арасында Садыр Жапаровдун агасы, ЖКнын мурдагы депутаты Каныбек Осмоналиевдин бар экендигин айтты. 

Садыр Жапаровдун тарапташтары ушул плакаттын ээлери менен урушуп кете жаздады

Чүй проспектисиндеги кыймылдын көрүнүшү.

Аянтта жайгашкан Чүй проспектисинде автокыймыл токтогон жок. Жол чийиндерине автоинспекторлор туруп кырдаалды жөнгө салып жатат.

Бүгүнкү митингди уюштуруучуларынын бири Бакай Кашкарбаев бийликке Садыр Жапаровду бошотуудан башка дагы 20дай талап коюларын айтты.

Алардын ичинде Сот реформасы, чек ара маселеси, саламаттыкты сактоо тармагын жакшыртуу, анын ичинде коронавирус боюнча абалды көзөмөлгө алуу деп бир азын санап берди. 

Садыр Жапаровдун штабынан анын элге кайрылуусунан улам тарапташтарынын көбү митингге чыкпагандыгын айтышты.

"Бул жакка негизинен айылда жашагандар келишти. Кыязы, аларга маалымат жетпей калса керек", — деп айтышкан биздин кабарчыга алар.

Азыр аянтка болжолдуу түрдө 250дөн ашуун киши чогулду.

Желек көтөрүп, топтошкан кишилер "Ала-Тоонун" чок ортосуна келди. 

Аянттагы кишилерден өзгөчө кадамдар байкалган жок. Ал арада биотуалеттер орнотулууда. 

Аянтка 200гө чукул киши чогулду. Алар учурда атайын аппаратураларды орнотуп жатат. Чогулгандардын арасынан аялдарды көрүүгө болот. Эркектердин жаш курагы 30-45 чамасында.

Борбордук аянтта митингге чыккандардан башкалардын да кыймылы токтогон жок. Чүй проспектиси менен автоунаалар каттап жатат. 

"Ала-Тоо" аянтына чогулгандар улам көбөйүүдө. 

Чогулгандардын башчысы тазалыкты, коомдук тартипти сактоого чакырып, митингди башка жарандарга жолтоо болбой тынч өткөрүү керектигин эскертти.

Болжол менен 30дан ашуун адам келди. Алар азырынча уюштуруу иштерин талкуулап, плакаттар жана аларды илүү, кармап туруу иштерин сүйлөшүүдө. Бул иш менен негизинен жаштар алек болуп жатканын байкоого болот. 

"Ала-Тоо" аянтына жана анын чет жакасына келген адамдардын саны өсө баштады. Жаштар Кыргызстандын желегин көтөрүп келип, "Илбирс" имаратынын капталына, тепкичтерге сая башташты.  

Учурдагы "Ала-Тоо" аянтынын көрүнүшү. 

Садыр Жапаровду 2017-жылдын 25-мартында кыргыз-казак чек арасынан Бишкекке кирип келе жатканда кармашкан. Буга анын Кум-Төр маселесине байланыштуу байланыштуу митинги себепкер болгон. Ага Кылмыш Кодексинин төрт беренеси менен иш козголгон. Бишкектин Биринчи май райондук соту Жогорку Кеңештин мурдагы депутатын кишини барымтага алды деп 11 жыл 6 айга эркинен ажыраткан. Сот 2013-жылдын 7-октябрында Жапаров уюштурган Караколдогу митинг учурунда анын катышуучулары өкмөттүн ошол кездеги өкүлү Эмил Каптагаевди автоунаага күч менен түртүп киргизгендигин айткан.

Жапаров өткөн жылдын октябрь айында президент Сооронбай Жээнбековго ырайым сурап кайрылган. Мамлекет башчы жыл жыйынтыктаган маалымат жыйынында бул маселе каралып жатканын айткан болчу.

Ал абакта отурган жылдары — 2017-жылы атасы Нуркожо Мустали уулу, 2019-жылы энеси Кадича Жапарова жана уулу Дастан каза болду.

Учурда "Ала-Тоо" аянты бош турат. Ал жерден Кайгуул кызматынын инспекторлорун кызматтык автоунаалары менен турганын көрүүгө болот. Андан сырткары үч эвакуатор борбордук аянтка, ал эми дагы бирөө Ак үйдүн жанында токтотулган.  

Ал арада ИИМ билдирүү таратты. Анда Кыргызстанда абалды туруксуздаштырууга аракет жасагандарга мыйзамдын негизинде катуу чаралар көрүлүп, күнөөлүүлөр жоопкерчиликке тартыларын эскертти. 

"ИИМ бардыгына бирдей мамиле кылат жана саясий маселелерге катышпайт. Ошол эле мезгилде мыйзам бузгандарга кескин чараларды көрөт. Эсибиз барда этегибизди жабуу керек, жалган маалымат таратуу менен кыргыз жергесинде жашаган бардык жарандарыбыздын коопсуздугуна шек келтирип жатасыздар. Ички иштер министрлиги коомчулукту туруксуздаштыруу боюнча чагымчыл жана башка жалган материалдарды таратуу үчүн мыйзамга ылайык кылмыш жоопкерчилиги каралгандыгын дагы бир жолу эскертет", — деп жазылган  министрликтин  билдирүүсүндө.

Митинг "Ала-Тоо" аянтында болот деген маалыматтан улам эртең менентен тарта автоинспектролор бул жерге автоунааларды токтотууга тыюу салды. Адатта бул жерге  ошол аймаккка жумуштап келгендердин жана аянттын тегерегинде жайгашкан ишкана-уюмдарда иштегендердин автокөлүктөрү токтотула турган. 

Жаздын экинчи күнү — 2-март саясий топтордун козголуусунан башталды. Борбор калаанын башкы аянтында Садыр Жапаровдун тарапташтарынын митинги өтөрүн 1-мартта, Бишкек мэриясы кабарлады. Анда саясатчынын тарапташтары акция өткөрөрүн мэрияга эскерткени айтылган.