БИШКЕК, 21-сен. — Sputnik. Мыйзамга ылайык соттолуп жаткан Садыр Жапаров атасына топурак салууга абактан кое берилбейт. Бул тууралуу Жаза аткаруу мамлекеттик кызматынан (ЖАМК) билдиришти.
Эске салсак, Жапаровдун атасы Мустали уулу Нуркожо 84 жашында 20-сентябрдын таңында үзүлгөн.
Анын сөөгү Ысык-Көл облусунун Түп районундагы Кең-Суусу айылына коюлат.
Буга чейин Жогорку сот Жапаровго карата чечим күчүнө киргендиктен анын атасына топурак салууга бараар-барбасын отурган абактын жетекчиси гана чечерин айткан.
Ошол эле учурда 69-берененин 3-пунктунда "Эгер соттолгон адам Кылмыш кодексинин 226 — 226-6, 227, 229, 232, 294, 295-1, 296, 299 — 299-3, 375 жана 376 беренелери боюнча соттолсо, анда аларга жогоруда жазылган мыйзам боюнча сыртка чыгууга уруксат берилбейт" деп жазылган.
Ал эми Садыр Жапаров Кылмыш кодексинин 227- "Барымтага алуу" беренеси боюнча соттолууда.
"Мындан улам ал абактан сыртка чыгарууга кое берилген жок", — деп кошумачалады ЖАМК.
Эске салсак, Жапаров 2013-жылы октябрда болгон митинг учурунда Эмилбек Каптагаевди барымтага алууну уюштурууга тиешеси бар деп күнөөлөнүп соттолууда. Анын ишин караган Бишкек шаардык соту камакта калтыруу чечимин кабыл алган.
Буга чейин райондук сот 11 жыл алты айга кескен болчу.
