БИШКЕК, 24-окт. — Sputnik. Жогорку Кеңештин депутаты Рыскелди Момбеков парламенттин жалпы жыйынында "Коопсуз шаар" долбоорун ишке ашыруунун биринчи жана экинчи этаптарында көз көрүнөө мыйзам бузулган деп айтты.
Момбеков "Коопсуз шаар" долбоору башталганда аны аябай мактагандар болгонуна токтолду.
"Президенттин өлкөнү санариптештирүү талабы менен өкмөт "Коопсуз шаар" долбоорун ишке ашырган. Аны апендинин кызындай макташкан. Эки күн мурда биздин комитетте (Транспорт, коммуникациялар, архитектура жана курулуш) бюджет каралды. Анда финансы министринин орун басары быйыл "Коопсуз шаар" долбоорунан түшө турчу акчанын көлөмү 1 миллиард 200 миллион сом болсо, 9 айдын ичинде 300 миллион топтолгонун айтты. Бул долбоордун каражат жагынан "капут" болгонун билгизет", — деди Момбеков.
Ал ошондой эле долбоордун башка кемчиликтерин дагы санады.
Депутат долбоорду ишке ашыруунун экинчи этабына катышкан кытай компаниясы мамлекеттик сатып алуулар боюнча мыйзамды бузган деген пикирин билдирди. Анын айтымында, депозит банк аркылуу которулушу кажет, бирок кытай компаниясы аны накталай берген.
"Тендерге катышкан кытай компаниясы атаандаштарынан 52 миллион сом ашык берип жатат. Бергенде дагы накталай берип жатат. Көз көрүнөө мыйзам бузулган. Экинчиден, утуп алган компаниянын беш жылдык тажрыйбасы болушу керек. Булардын андайы жок, лицензиясы жок, келе турчу жабдуулары стандарттан өткөн эмес. Ушундай толгон-токой мыйзам бузуулар болуп турса дагы тендердин жеңүүчүсү кылып аныктап коюшту", — деп эл өкүлү нааразы болду.
Момбеков төрага Дастан Жумабековго кайрылып, протоколдук тапшырма менен тармактык комитетте жумушчу топ түзүп, алар "Коопсуз шаар" долбоорунун биринчи, экинчи этаптарын карап чыгышы керектигин сунуштады. Буга жооп кылган Жумабеков тийиштүү комитеттерге протоколдук тапшырмалар жөнөтүлө турганын айтты.
Эске салсак, "Коопсуз шаар" долбоорунун экинчи этабын ишке ашыруу боюнча тендерди кытайлык Shenzhen Sunwin Intelligent Co. Ltd компаниясы жеңип алган. Аталган компаниянын тарых-таржымалын окуп коюңуз.
