БИШКЕК, 1-окт. — Sputnik. Сооронбай Жээнбеков Ереван шаарында Жогорку Евразиялык экономикалык кеңештин (ЖЕЭК) жыйынынын алкагында Молдованын президенти Игорь Додон менен жолукту. Бул тууралуу президенттин маалымат кызматы билдирди.
Анда эки тараптуу мамилелердин азыркы абалы жана келечеги талкууланган.
"Сооронбай Жээнбеков Молдова менен өз ара кызматташтыкты өнүктүрүүгө кызыкдарлыгын билдирип, учурдагы эки тараптуу мамилелердин деңгээли өлкөлөр ортосундагы потенциалга жооп бербей тургандыгын белгиледи. Ал дагы бир ирет Кыргызстан жана Молдованын ортосундагы соода-экономикалык жана маданий-гуманитардык байланыштарды активдештирүүнүн маанисин баса белгиледи", — деп айтылат маалыматта.
Жээнбеков, андан сырткары, Додонду Кыргызстанга расмий визит менен келүүгө чакырды. Ошондой эле Кыргызстандын айыл чарба продукцияларын Европа биримдигине чыгаруудагы Молдованын ийгиликтүү тажрыйбасын изилдөөгө кызыгуусун белгиледи.
Молдованын президенти алардын биримдик менен жакындашуусу 2017-жылдын апрелинде дал Бишкекте өткөн Жогорку Евразиялык экономикалык кеңештин жыйынында башталганын билдирди.
Андан сырткары, Додон Жээнбековдун расмий сапар менен Кыргызстанга келүү чакыруусун кабыл алып, аны дагы Молдовага сапар менен келүүгө чакырды.
