ОШ, 27-июн. – Sputnik. Араван районунда сууга аккан аялын куткарам деп өзү да чөгүп кеткен жигиттин сөөгү Өзбекстандан табылды. Бул тууралуу Өзгөчө кырдаалдар министрлигинин Ош облусу боюнча башкармалыгынын башчысы Исабек Эргешов билдирди.
Эске салсак, 2019-жылдын 20-июнунда саат 11:00дөр чамасында Түштүк Фергана каналына кокустан түшүп кеткен жубайын куткаруу үчүн жолдошу да сууга секирип, кошо агып кеткен. 22 жаштагы келиндин сөөгү 22-июнда Өзбекстандын аймагынан табылган.
Түштүк Фергана каналынын суусу Өзгөн районундагы Кемпир-Абад суу сактагычынан агып келет. Ал Араван району аркылуу Өзбекстанга барат.
Буга чейин ӨКМдин Кризистик кырдаалда башкаруу борборунун кызматкерлери тарабынан Өзбекстандын тийиштүү органына көмөктөшүү жөнүндөгү кат жолдонгон.
