Бишкекте Дүйнө элдеринин эпосторунун V фестивалы башталды. Бул тууралуу Дамира Алышбаева Sputnik Кыргызстан радиосунун таңкы эфиринде маек куруп жатып билдирди.
Анын айтымында, фестиваль үчүн 14 боз үй тигилген.
"Бүгүн саат 10:00дөн тарта Бишкекте Дүйнө элдеринин эпосторунун V фестивалы башталды. Элет жеринен иш-чара үчүн 14 боз үй алып келинип тигилди. Ийгиликтүү өткөрүп алышыбызды тиленип жатабыз. Фестиваль илимий-практикалык жана маданий бөлүктөн турат. Анын алкагында этникалык мурасты сактоо жана жайылтуу маселелерине арналган симпозиум өтөт. Ал эми маданий программада көчмөндөр кийимдеринин көргөзмөсү, уз-чеберлердин колунан чыккан эмгектердин жарманкеси уюштурулду. Ошондой эле иш-чарага катышуу үчүн КМШ өлкөлөрүнөн 45тен ашуун окумуштуу менен илимпоз келди", — деди Алышбаева.
Ал фестивалдын жүрүшүндө "Мыкты боз үй", "Көчмөн стили", "Мыкты манасчы" жана "Мыкты дастанчы" сынактары Токтогул Сатылганов атындагы Кыргыз улуттук филармониясында өтөрүн кошумчалады.
