Депутат: "Коопсуз шаардын" айып пулунун көлөмүн тезинен азайтуу керек

Жазылуу
Рыспаев бул маселени буга чейин да бир нече жолу көтөргөнүн айтып, бирок андан майнап чыкпай жатканына токтолду.

БИШКЕК, 16-май — Sputnik. Жогорку Кеңештин депутаты Кожобек Рыспаев "Коопсуз шаар" долбоорунун кесепеттери кооптуулукка алып келиши мүмкүн экенин парламенттин жалпы жыйынында билдирди.

Депутат бул маселени буга чейин да бир нече жолу көтөргөнүн айтып, бирок андан майнап чыкпай жатканына токтолду.

"Коопсуз шаар" боюнча баарыбыз "сонун болду" дегенде "айып пулдардын көлөмүн азайткыла" деп айттым эле. Бүгүн мына элдин 20 пайызы гана төлөп жатат. Калгандары төлөгөн жок. Бул азыр кооптуулукка алып келет. Биз алыбызга жараша айып пулдарды салбай, асмандатып салып алдык. Эл аны бүгүн төлөй албайт, муну тез аранын ичинде карап чыгыш керек. Социалдык абалга карап айып пулдардын өлчөмүн ылдыйлатыш керек. Биз бул абал менен жылып отурсак, элди тупикке тыгабыз", — деди ал.

Камеры фиксации нарушений пдд в Москве - Sputnik Кыргызстан
Айдоочу, абайла! Бишкекке дагы 19 камера орнотулду. Жалпы тизме
Эл өкүлү ошондой эле жолдордо шарт жок болгондуктан, айдоочу кош сызыкты тепсөөгө аргасыз экенин кошумчалады. Аны менен катар долбоор башталар алдында жол чырактар коюлбай, жол чийиндер чийилбегендиктен катардагы жарандар эле жабыркап жатканын белгиледи.

Белгилей кетсек, февралдан тарта Бишкек шаарында жана бир катар кан жолдордо "Коопсуз шаар" долбоорунун камералары орнотулуп, жол эрежесин бузгандарды каттоого ала баштаган.

Жаңылыктар түрмөгү
0