Жогорку Кеңештин депутаты Азизбек Турсунбаев картошканы экспорттоо боюнча бир гана Айыл чарба министрлиги ур-тепкиге алынып жатканын, аныгында экспорттоо ишине Экономика жана Тышкы иштер министрликтеринин да түздөн-түз тиешеси бар экенин парламенттин жалпы жыйынында айтты.
Турсунбаев биринчи вице-премьер Кубатбек Бороновго кайрылып: "Картошканы сатып өткөрүүгө Экономика министрлиги укуктуубу?" - деп суроо салды.
Ал эми Боронов бир товарды түздөн-түз сатып өткөрүүгө бир дагы мамлекеттик органдын укугу жок экенин билдирди.
"Түздөн-түз алып сатуу иштерине кийлигишүүгө бир да мамлекеттик органдын укугу жок. Алар ошого шарт түзүү боюнча иштерди аткарууга милдеттүү, Экономика жана Айыл чарба министрликтери өз уставына жараша иш-аракеттерин жүргүзүүдө", — деди Боронов.
Депутат картошканы сатуу иштерине элчилер да көмөктөшүүсү керектигин айтты.
Турсунбаевдин айтымында, картошканы сатуу үчүн учурда бир гана Өзбекстандагы элчи чуркап жүрөт.
"Тажикстандагы, Казакстандагы, Түркмөнстандагы элчилер эмне иш кылып жатат? Ошолордун да түздөн-түз тиешеси бар. Эмнеге көзөмөлдөбөйсүздөр? Экономика министри Олег Панкратов ЕАЭБдин ичинде болуп жаткан тоскоолдуктарды контролдош керек эле. Өзүңөр Казакстан күйүүчү майга салык киргизип койду деп жатасыңар. Эмне үчүн силер башка товарларга киргизбейсиңер? Панкратов силерге жагышы мүмкүн, бирок комитеттин же фракциянын жыйынына чакырсаң келбейт. Аябай эрке бала кылдыңар, азыр иштеши керек" — деди депутат.
Эл өкүлү айыл чарба министрин эле карап отура бербей, бул иш боюнча дал ушул Панкратов чуркашы керектигин кошумчалады.
Ал эми Боронов депутаттын сунушун карап көрүшөрүн, Панкратов сырттагы иштерге, анын ичинде ЕАЭБдин жумуштары боюнча көп нерсе жасап жатканын айтты.
