БИШКЕК, 3-мар. — Sputnik. Кытайдын тургуну мышыгына пластикалык операция жасатуу үчүн 10 миң юань (1500 доллардын тегереги) короткон. Бул тууралуу The Daily Mail жазды.
Басылманын билдирүүсүнө ылайык, аты аталбаган аял жаныбарынын кебетеси суук, көзү азиат улутундагы адамдардыкындай экенин айтып нааразы болгон.
Мындан улам ал пластикалык операциянын жардамы менен мышыгынын көзүн европалыктардыкындай кылууну чечкен.
Ойлогон оюн аял ишке ашырган.
Кийинчерээк мышыктын операциядан кийинки сүрөтү менен видеосу интернетке жарыяланып, колдонуучуларды таң калтырган.
Анда мышыкка атайын жака кийгизилип, көзүнүн айланасындагы жүндөр кырылган. Көздөрү кызарып, тиккен жиптери көрүнүп калган.
Бул тема боюнча жергиликтүү телеканалдар сюжет даярдашкан. Анда мышыктын ээсин жана ага операция жасаган дарыгерлерди жаныбарга аеосуз мамиле кылган деп айыпташкан.
