БИШКЕК, 15-фев. — Sputnik. 2018-жылдын жыйынтыгы боюнча ички дүң продуктунун (ИДП) көлөмү 557,1 млрд. сом суммасында болуп, анын реалдуу өсүү темпи 3,5 пайызды түздү. Бул туурасында өкмөттүн басма сөз кызматынан кабарлашты.
Бул маалыматтар өкмөттө өткөн 2018-жылкы социалдык-экономикалык өнүгүүсүнүн жыйынтыгы чыгарылган жыйында айтылды.
Экономикалык өсүш негизинен айыл чарба (2,7 пайыз), курулуш (7,8 пайыз), тейлөө (2,1 пайыз), өнөр жай (5,5 пайыз) тармактарында байкалды.
"Экономикадагы орун алган көрсөткүчтөрдүн натыйжасында, товар өндүргөн тармактардын ИДПнын номиналдык түзүмүндөгү үлүшү 39,0, тейлөө көрсөткөн тармактардын үлүшү 46,8 пайыз болду", — деп билдирген экономика министри Олег Панкратов.
Кыргызстандын макроэкономикалык көрсөткүчтөрүнүн түзүлүшүндө негизги жагымдуу факторлор катары өлкөдөгү социалдык-саясий туруктуулук, текшерүүлөрдүн, лицензиялардын санын кыскартуу болгондугу айтылат. Алардын катарында бизнес жүргүзүү үчүн жагымдуу шарттарды түзүү, алтынга карата баанын орточо 1,0 пайызга өсүшү жана соода жүргүзүүдөгү негизги өнөктөш өлкөлөрдөгү экономикалык өсүш турган.
2018-жылдын январь-ноябрь айындагы тышкы соода жүгүртүү 5967,6 миллион долларды түзүп, мурдагы жылга салыштырмалуу 6,2 пайызга жогорулаган.
Премьер-министр Мухаммедкалый Абылгазиев жыйында Кыргыз-Россиялык өнүктүрүү фондусунун линиясы боюнча долбоорлорду ишке ашырууда облустар чегинде диспропорция байкалып жатканын айткан.
Өкмөттөн буга байланыштуу жергиликтүү бийлик жетекчилерин жер-жерлерде ишкерликти колдоого алуу процессине активдүү киришүүгө чакырды деген деп кошумчалашты.
