Биз бири-бирибизге ишенүү менен алдыга кадам таштайт экенбиз. Ишеним жок жерде иш жүрбөйт эмеспи. Бир адамга ишенип жумуш табыштайбыз, кызматташтабыз, жолугушабыз, жакшылыктарыбызга чакырабыз, сырларыбызды айтабыз жана сүйөбүз. Жада калса өзүбүзгө-өзүбүз толук ишенип, кооптонууну жокко чыгарганда гана ийгиликке жетишебиз. Анткени ишеним деген нерсе жашообузда чоң роль ойнойт экен. Аны гүлгө салыштырсак болот, адамдарга болгон ишеничиң акталган сайын жанагы гүл көркүнө чыгып жалбырактары жаркырап, гүлүн ачат. Ал эми ошондой чоң ишеним менен өсүп жаткан гүлдү тебелеп, сындырып кетүү да колубуздан келет. Айрымдардын бирөөнүн ишеничине киргенден кийин кантип бети чыдап алдап коёрун түшүнө албайм. Баса, мындай ишенимди жоготуу башымдан өтпөгөнүн белгилеп коёюн. Бирок башкаларды көргөндөн кийин, аябай ишенип жүргөн адамдарыма кулак кагыш кылып коюуну туура көрдүм. Кесепет менен күрөшпөй, алдын алган жакшы да. Ошондой ишеничке кирип, андан соң алдагандарды адамдык сапаты эң төмөн экен деп сый-урматым жоголот. Андайларга баш оорутпай, жөн гана көңүлдөн чийип койгон эле жакшы. Өзү менен өзү болуп жүрө берсин. Мындай принцип менде эле эмес, баарында болсо керек. Андыктан ортодогу ишенимди жоготпойлу. Кеттик эмесе, чоң ишеним менен кечээги күндүн маанилүү жаңылыктарын тизмектейли.
Жакында эле биз ишенип барып жүргөн тамактануу жайлары санитардык талаптарга жооп бербегенин билдик. Муну бизге ачыктап берген Санэпидемстанциянын дарыгери Майрам Иманкулованын маегин окуңуздар.
Көчмөн турмуштан тарта азыркы убакка чейин коомдук жана мамлекеттик иштерге аралашып, саясаттын казанында кайнаган айымдарды эсиңизге салабыз. Буларга кыргыз эли чоң ишеним арткан.
Айткылачы, Тышкы иштер министрлигине ишениш керекпи же элчи Кылычбек Султангабы? Балким аларды текшерген Коопсуздук кеңешине ишенгенибиз оң болоор… Эки тараптан тең мыйзам бузуулар чыгып жатат.
Депутат Ирина Карамушкина Санкт-Петербургда жүргөн кыргыздардын абалына кейиди. Ал эми Бакыт Төрөбаев Дача айылына кулаган учактагы жүк кимге тиешелүү болгонуна кызыкты.
Хабиб Нурмагомедовдун алигиче ыры да, чыры да бүтө элек. Кечээ аны менен Россия президенти Владимир Путин жолугуп, жеңиши менен куттуктады.
Анан ноябрь айында беш күн катары менен эс алат экенбиз. Жумушуңуздар болсо ошого карап пландап алыңыздар.
Ал эми быйыл кыш кандай болоруна кызыгып жатсаңыз бул жакка баш багыңыз.
Бүгүн өлкөнүн тоолуу аймактарында жаан жаап, күн күркүрөшү күтүлөт.
Валюта наркы. Сомдун баасы долларга карата орто эсеп менен 69.17 (сатып алуу) жана 69.49 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгү бензин 46.30 сом, АИ-92 үлгүсүндөгү май 43.80 сом, ал эми дизель майы 45.50 сомдон сатылууда.
Соңку сөз. Ишенген адамдарыбыз көп болсун!
Амандыгыңызды тилеп Эламан Карымшаков.
