Мамакеев туулган күнүн да бейтапканада өткөрдү. Замандаштары хирургдун тактыгына бекеринен баа бербесе керек, анын бир мүнөтү да текке кетпейт. Таң эрте иш бөлмөсүндө гимнастикалык көнүгүүлөрдү жасагандан кийин операцияга кирет.
Бүгүн ал оорулуунун өтүндөгү ташты алып чыгышы керек.
"Бул дарт менен жабыр тарткандардын саны кийинки учурда өсүп эле баратат. Өттөгү ташты балка менен чапсаң да сынбайт. Бир гана жолу — операция", — деп хирург наркоздо жаткан кишинин өмүрү менен күрөшүп жатты.
Жарым саатка жетпей операция аяктады. Мамакеев илгеркиге салыштырмалуу заманбап аппараттар жумушту бир топ илгерилеткенин айтат.
"Дүйнөлүк практикада 60тан ашкан хирург бейтапка жолобойт. Себеби көз тунарып, кол дарманга келбей, унутчаак да боло түшөсүң. Эми мага Кудай Таалам ден соолукту берсе керек. Андай кемчиликтерим жок. Карылыкка баш ийбеш керек. Оорудум деп жатып алсаң бир жумада турбай каласың. Ден соолукту иш менен алаксытыш керек. Күн сайын ишке чыгып бейтапка өмүр бергеним мага майрам", — деди Мамакеев.
Ал ошондой эле өмүрүндө чылып чегип, ичимдик татып көрбөгөнүн кошумчалады.
Мамакеев каалоосу күч адамдын баары хирург боло бербейт, ийгиликке жетүү үчүн чыдамкайлык, сабырдуулук жана талант керектигин баса белгилейт.
"Адам жеңбей турган эч нерсе жок. Мен асмандан даяр түшкөн жокмун. Баскан жолум эмгек, аракет менен коштолду. Айылдан "да", "нет" деген сөздү билбей келгем. Үчүнчү курска чейин сабакты түшүнбөй аны жаттап айтып берчүбүз. Кудай талант деген нерседен да куру калтырбаса керек. Биринчи күндөн тарта хирургиялык ишим жакшы кетти. Болбосо мүнөзүм начар, оройлук жайым бар", — деди белгилүү дарыгер.
Мамакеевдин өмүр таржымалын угуп отурса өзүнчө эле бир жомок экен.
Ал 1927-жылы 1-октябрда Ысык-Көл облусуна караштуу Ак-Суу районундагы Кереге-Таш айылында туулган. Ата-энеси 17 балалуу болуп, арасынан чарчап калгандары көп болгон. Мамакеев болжолдуу түрдө ортончу бала. Атасы Мамаке 93, апасы 85 жашында каза болуптур.
Мамлекеттик сыйлык жана наамдардарын санап отурса манжа жетпейт. Эң ириде 2004-жылы "Кыргыз Республикасынын Баатыры" наамы ыйгарылган.
Убагында саясатка да аралашып СССРдин жана Жогорку Кеңештин бир нече жолку депутаты болгон.
Өмүрлүк жары Сонумкан Чекирбаева менен эки уулду тарбиялаган. Балдары атасынын жолун жолдоп келет. Учурда экинчи уулу Канат Мамакеев Улуттук хирургия борборунун жетекчиси.
