Хирургдардын атасы Мамбет Мамакеев 90 жашта! Атактуу дарыгер тууралуу 9 факты

Мындан улам Sputnik маалымат агенттиги кыргыз медицинасына опол-тоодой эмгеги бар Мамбет Мамакеев тууралуу 9 факты даярдады.

1. 17 баланын улуусу. Мамбет Мамакеев 1927-жылы 1-октябрда Ысык-Көл облусуна караштуу Ак-Суу районундагы Кереге-Таш айылында туулган. Ата-энеси 17 балалуу болуп, арасынан чарчап калгандары көп болгон. Мамакеев үйдүн тун баласы. Атасы Мамаке 93, апасы 85 жашында каза болгон.

2. Мен ким элем, ким болдум? Өзүнүн эскерүүсүндө институтка келгенде бир да орусча сөз билчү эмес. Шаарга жылаңайлак, жылаңбаш келген. Окуудан кыйналган күндөрү Иса Ахунбаевге барып "кетсекпи, эч нерсе түшүнгөн жокпуз, кыйналып кеттик" десе, ал "чыдагыла, кыргыздан кадр жок" деп окуусун улантууга көндүргөн. Бүткүчө кыйналып, күн-түн дебей окуп, берген тапшырманын маанисин түшүнбөй ырча жаттап айтып берген күндөрү көп болгон. Ошондон улам Мамакеевдин "Мен ким элем, ким болдум. Азыр менде болгон-бүткөн наамдар бар" деп айтканы бар.

3. 65 жылдык иш тажрыйбасында 30 миңге чукул операция жасаган. Бул тууралуу өзүнүн тастыктаганы бар. Чарчап кеткен учурда операцияларды креслого отуруп алып жасайт. Күнүгө үч-төрт, кээде жети-сегиз бейтап колунан өтөт. 

4. Дүйнөдөгү эң кары хирургдардын бири. Мамбет Мамакеев 90 жаш курагына карабай бүгүн да ишин улантып келет. Ал дүйнөдө эмгек жолун улантып жаткан эң кары хирургдардын бири болуп саналат.

5. Хирургга жасалган үч операция. Мамакеев 80 жашында табарсыктын алдында жайгашкан аденома безинен арылган, 11 жыл мурда көзүнүн агарып кеткен хрусталын алмаштырган. Ал эми 1,5 жыл мурда Германияга барып жүрөктүн чоң кан тамыры — толтону жасатып келген.

6. Кызыгы көп Мамбет ага! Компьютерди такыр колдонуп көргөн эмес. Уюлдук телефону бар, бирок көп пайдаланбайт. Жаш кезинде күрөштөргө катышып, улакка түшкөн. Кросс боюнча алтын медалы бар. Фрунзеге жаңы келгенде бокс секциясына барып жүрүп, колун чыгарып алып таштап койгон.

7. Институтту бүтөр замат кемпири Сокенге баш кошкон. Эки уулу бар. Алар атасынын жолун жолдогон. Экинчи уулу Канат Мамакеев үч жылдан бери атасынын ордунда жетекчи.

8. Көптөгөн мамлекеттик сыйлык жана наамдардын ээси. 2004-жылы "Кыргыз Республикасынын Баатыры" наамы ыйгарылган. СССРдин Жогорку Кеңешинин 4-чакырылышынын, КРдин Жогорку Кеңешинин 2-чакырылышынын депутаты. КРдин Хирургиялык коомдор ассоциациясынын президенти.

9. Мамакеев 200дөн ашык илимий эмгектин автору. Илимдин 15 докторун, 26 кандидатын тарбиялаган. Hегизги илимий эмгектери өт ооруларын дарылоо, өттөгү ташты хирургиялык жол менен алуу, ошондой эле бейтаптарга хирургиялык шашылыш жардам көрсөтүүгө арналган.