БИШКЕК, 24-сен. — Sputnik. Журналистти "келесоо" деп атаган Жогорку Кеңештин депутаты Тазабек Икрамов баарлашуу учурунда эки-үч унаасы бар экенин айткан. Бирок ал мамлекетке тапшырган декларациясында бир да автоунаасы жоктугун көрсөткөн.
Депутат журналист менен биринчи жолу сүйлөшкөндө "мен бир эмес эки-үч, ар кандай машинада жүрө берем" деген. Ал эми кечээги баарлашууда "менин канча машинам бар экенин билесиңби?!" деп суроо салган. Журналист анын канча унаасы бер экенинен маалыматы жоктугун айтып, кайра өзүнө суроо салганда унчукпай тим болгон.
Мындан улам Sputnik агенттиги депутаттын Мамлекеттик кадр кызматынын сайтына жарыяланган 2015-2016-жылдардагы декларациясы менен таанышып чыкты.
2015-жылы Тазабек Икрамовдун жеке унаасы жок болгон. Бирок жакын туугандары 2008-жылы чыгарылган Toyota Land Cruiser 200 жана Toyota Highlander унаасына ээлик кылганы айтылат. Өзүнүн 1784 чарчы метрлик турак жайга жана курулуш объектисине (0,20 чарчы метр) ээлик кылары көрсөтүлгөн. Бул жылы 71 900 сом гана тапкан. Жакын туугандары болсо 2,4 миллион сом иштеп тапкан. Мындан сырткары, алардын 570 чарчы метр үйү, 570 чарчы метр жер тилкеси жана 337,2 капиталдык курулушу бар экени көрсөтүлгөн.
Ал эми 2016-жылдагы декларациясында өзүнүн да, жакын туугандарынын да унаасы жок экени маалымдалган. Ал документке ылайык, Икрамов жер тилкеси, турак жай жана курулуш объектилерине ээлик кылат. Депутаттык кызматы үчүн 634 миң сом алган. Үйү жана чарбалык объектиси бар. Жакын туугандарынын кирешеси 200 миң сомду түзгөн.
Ал эми 2017-жылга карата декларация азырынча жарыялана элек.
