Оюндун видеосунан көрүнүп тургандай, таластык команданын оюнчусу Руслан уулу улакты алып келе жаткан жеринен аттан кулап, тай казанга катуу урунат дагы артка ыргып кетет. Ошондой эле анын денеси карышып калганын дагы көрүүгө болот.
"Бакубат Талас" командасынын жетекчиси Марлен Жапаркулов учурда оюнчу ооруканада жатканын, акыбалы жакшы экенин айтты.
"Ат катуу ылдамдыкта келе жатып эмнегедир тай казанга жеткенде качып кетти. Ошол маалда Эламан тайказанга жамбашы менен тийип, сөөгү чыгып кетиптир. Дарыгерлер дароо рентгенге тартып көрүп, чыккан сөөктү ордуна келтиришти. Башка эч жеринен жаракат жок. Болгону сөөк ойноок болуп калбасын деп 10 күнчө ооруканада жатып турууну сунушташты. Акыл-эси ордунда, башка дарты жок", — деди жетекчи.
Мындан тышкары, ал спортучунун апасы Таластан келип, уулунун абалы менен таанышып, санаасы тынчып кеткенин кошумчалады.
Эламан Руслан уулу 25 жашта. Командадагы позициясы — чабуулчу. Көк бөрүдө жети жылдык тажрыйбасы бар. "Бакубат Талас" командасында ойноп жатканына үч жыл болду.
Эске салсак, аталган мелдеште баш байгени Таластын "Бакубат Талас" командасы жеңип алган.
