Официантка "догурунган" инспектор: ашкананын кызматкерлери кечирим сурады

БИШКЕК, 20-июн. — Sputnik. Жол кыймылы коопсуздугун камсыздоо башкы башкармалыгынын кызматкери Бакыт Жукалаев аны тамакка ыпыр-сыпыр салды деген сөздөр чындыкка дал келбей турганын аталган башкармалык Sputnik Кыргызстан агенттигинин кабарчысына билдирди.

Окуя Боом капчыгайындагы тамактануу жайларынын биринде болгон. Камерага тартылып калган видеодо автонинспектордун формасын кийген киши колуна кара бир нерсени кармап, аны тамакка кошуп, дароо официантты чакырганын көрүүгө болот.

Видеонун автору милиционер тамактын акчасын төлөбөш үчүн ушундай кадамга барды деп билдирген. Ал ортодо Жол кыймылы коопсуздугун камсыздоо башка башкармалыгы бул айыптоолорду четке кагып, кызматкер жеген тамагынын акысын төлөгөнүн айткан.

Жукалаевдин айтымында, эч кандай чыр болгон эмес.

"Кола алып келип бергиле деп айтканбыз. Бир аз түшүнбөстүк болуп кетти, бизге бул жерде кардарлар өзүн өзү тейлей турганын түшүндүрүштү. Биздин кызматкер суусундукту өзү алып келди", — деди инспектор.

Ал ошондой эле тамакка эч нерсе салбаганын кошумчалады.

"Борщ ичип жатканда оозумдан целлофандын бөлүгү чыкты. Мен кызматкерди чакырып, тамактан целлофан чыкканын айттым. Бардыгын жай гана түшүндүрдүм. Мунун баарын социалдык тармакка жарыялаган жокпуз да. Кызматкердин башка шаардан келген таанышы же тууганы видеонун бир бөлүгүн алып туруп Интернетке чыгарып жибериптир", — деди ал.

Инспектор ошондой эле андан кечирим сурап, тамакты алмаштырып берели дешкенин кошумчалады. Андан сырткары, бекер тамак ичели деген ой такыр болбогонун, жеген тамагынын акысын толугу менен төлөп чыгышканын айтты.