БИШКЕК, 30-май — Sputnik. Москвада курулуш тармагында эмгектенген 26 жаштагы Нуржигит Бердикул уулу 4-кабаттан кулап кеткен. Ал оор жаракат алганына карабай курулуш компаниясынын өкүлдөрү каралашуудан качып жатат. Бул тууралуу Sputnik Кыргызстан агенттигине жабырлануучунун жубайы Айлира Осмонова билдирди.
Анын айтымында, кырсык үстүбүздөгү жылдын 17-майында болгон.
"Жолдошум төртүнчү кабатта иштеп жатканда астына коюлган такта сынып кетип жерге кулаган. Ал түрдүү нерселерге урунгандыктан башы жарылып, буту, бели жана жамбашы үч жеринен сынып кеткен. Тез жардам унаасы келгенде жумушчуларды тескеген компаниянын өкүлү анын жанында иштегендерди үйүнө кетирип, өзү ооруканага алып барган. Ал дарыгерлерге кырсык болгонун жашырып, окуяны башкача сүрөттөп коюптур. Анан мага телефондон кабарлап коюп, өзү кетип калган", — деди Осмонова.
Мекендеш алган жараатынан улам төрт күн өзүнө келбей жандандыруу бөлүмүндө жаткан.
Ал ошондой эле, күйөөсү аталган жайда иштегенине эми гана сегиз күн болгондо кырсыктаганын кошумчалады.
Ал эми Кыргызстандын Россиядагы элчилигинин маалымат кызматы бул окуя боюнча иш-аракеттер жүрүп жатканына ишендирди.
"Маселе элчиликтин көзөмөлүнө алынган. Биздин юристтер ишти карап жатышат. Алар курулуш компаниясы менен сүйлөшүп, чыгымдарын төлөттүрүүгө аракет кылууда. Ошол эле учурда иш козготуу үчүн прокуратурага документ даярдап жатышат", — деп элчиликтен билдиришти.
Нуржигит Бердикул уулу Жалал-Абад облусунун Сузак районуна караштуу Жоон-Күңгөй айылында туулган. Үй-бүлөдө тогуз бир туугандын улуусу, өзүнүн үч кызы бар. Ал көп жылдан бери Россияда иштеп келет.
