БИШКЕК, 3-мар. — Sputnik. Ош шаарында 8-март Аялдардын эл аралык күнүнө карата айымдар арасында волейбол жана баскетбол боюнча мелдеш өтөт. Бул туурасында калаанын Дене тарбия жана спорт комитетинен билдиришти.
Аталган иш-чара 6-7-март күндөрү өтүп, айымдар эки топко бөлүнүп мелдешишет. Биринчи топто Ош шаарындагы бардык мекеме-ишканалардын, күч түзүмдөрүнүн, билим берүү, медицина жана коомдук уюмдардын кызматкерлери күч сынашат. Ал эми экинчи топто калаанын жогорку жана орто окуу жайларынын студенттери ойнойт.
Жеңишке жеткен командалар Ош шаардык дене-тарбия жана спорт комитети тарабынан диплом, кубок жана баалуу белектер менен сыйланышат.
Мелдешке катышууну каалаган мекемелер 5-мартка чейин Ош шаардык дене тарбия жана спорт комитетине табыштама жибере алышат.
Эскерте кетсек, Ош шаарында Ата Мекенди коргоочулардын күнүнө карата дагы эркектер арасында волейбол жана баскетбол мелдеши өткөн.
Баса, колу Коконго, буту Букарга жеткен оюнчулар. Учурдун мыкты волейболчулары менен таанышып алыңыздар!
