БИШКЕК, 1-мар. — Sputnik. Мурдагы элчи Замира Сыдыкова АКШда курал-жарак аткезчилиги менен кармалды делген баласы Теңгиз Сыдыков боюнча пикирин Sputnik Кыргызстан агенттигине билдирди.
Белгилей кетсек, Американын ЖМКлары Чеченстанга 100дөн ашык курал-жаракты ашкана буюмдары деп салган Теңгиз Сыдыков менен Элдар Резванов аттуу жарандар Вирджиния штатында колго түшкөнүн маалымдаган. Теңгиз Сыдыков Кыргызстандын АКШдагы мурдагы элчиси Замира Сыдыкованын баласы экенин ЖМКлар билдиришти.
Экс-элчи жогорудагы окуя боюнча түрдүү маалыматтар чыгып жатканын айтты.
"Бул, албетте, акылга сыйбаган нерсе, мунун бардыгы эртең чечилиши керек. Баламды досу экөөнү 72 саатка кармашкан. Уулум камакка алынган досун колдоо үчүн полиция участкасына өзү барган. Алар чогуу бир квартирада жашагандыктан окуянын чоо-жайы такталганга чейин уулумду дагы кармашкан. Эртең сот болот, анда башкача чечим чыгат", — деди ал.
Сыдыкова уулу курал-жарактын аткезчилиги менен эмес, IT-компаниясында иштей турганын кошумчалады.
