БИШКЕК, 23-янв. — Sputnik. Филиппиндин президенти Родриге Дутерте эгер ал конституцияны бузуп, бийликте белгиленген мөөнөттөн көп калууга ниеттенсе атып салууну аскерлерге буюрду. Бул тууралуу Rappler.com порталы билдирди.
"Эгер мен бийликте белгиленген мөөнөттөн көп калууга ниеттенип, диктатор болууга аракет кылсам мени атып салгыла. Тамашалаган жокмун. Эгер бийликте бир күн дагы ашык отурсам Филиппиндин куралдуу күчтөрүн жана улуттук полицияны конституцияны сактоого чакырам", — деген пикирин Дутерте аскер базасына барганда билдирди.
Филиппиндин президенти 2016-жылы май айында өлкө башчылыкка шайланган. Ал баңгизатына көз каранды болгон жана аны тараткан кишилерге каршы күрөш баштаган. Полициянын маалыматына ылайык, Дутерте бийликке келгенден бери баңгизатын сатууга катыштыгы бар болгон 2,4 миң киши жок кылынган. Дүйнө коомчулугу Дутертенин бул аракетин кескин сынга алган.
